Kolektiboen arabera, aurten prestatuko dituen 102.000 lagunetatik 42.000 pasatxo enplegu-eskatzaileak izango dira; 21.000, Hobetuz-en etengabeko prestakuntzako ikastaroak egiten dituzten jarduneko langileak; eta beste 39.000, enpresek antolatutako prestakuntza egiten duten langileak. Bonifikazioa jasotzen dute prestakuntza hori egitearren.
Aurreko deialdiekin alderatuta, berrikuntza nabarmen bat dago: profesionaltasun-ziurtagirien aldeko apustu sendoa, 200 bat espezialitate eskaintzen dira-eta, aurreko urteetan baino gehiago. Profesionaltasun-ziurtagiria lan-administrazioaren esparruan lanbide-trebakuntzak modu ofizialean egiaztatzeko tresna da.
Euskaditik kanpo, gutxiago inbertitu da
“Gure ustez, orientazioa eta prestakuntza dira Lanbideren zutabeak, eta are gehiago pairatzen ari garen krisi ekonomiko larriko testuinguru honetan, eta horregatik ari gara erronka horri eusteko eta erronka hori indartzeko ahalegina egiten”, azaldu du Javier Ruiz Plangintza eta Enpleguko sailburuordeak. Gogorarazi duenez, "hemendik kanpo", iaz prestakuntzara bideratu ziren 100 euro bakoitzeko aurten 47 euro bideratu dira; Euskadin, ordea, iaz 100 euro ipintzetik aurten 114 euro ipintzera pasatu gara.
Prestakuntza-ildoa hainbat ardatzetan oinarrituta dago: prestakuntza ziurtagarria eta ziurtaezina, laneratzeko zailtasun handiak dituzten kolektiboentzako eta langabe guztientzako prestakuntza, prestakuntza kontratazio-konpromisoarekin
eta praktiketarako konpromisoarekin, bekak, prestakuntzarako laguntzak eta abar.
Prestakuntza hori Lanbideren batzorde teknikoetan adostutakoa da, Confebask-ekin, UGTrekin eta CCOOrekin batera.