Auto askoren atzealdean bidaiatzen duen ardi horri adarrak eta buztana atera zaizkio, eta artile latzagoa erakusten du orain, gainera. Horrela, gure herrialdeko ardi latxaren antz handiagoa du. Horixe dio Ardilatxaren kudeatzaileak, irabazi asmorik gabeko Arkide elkarteak, hain zuzen ere. Arantzazuko Gomistegi baserriko egoitzatik, Euskal Herriko artzain jarduera ikertzea eta zenbait hobekuntza egitea ditu helburu elkarteak, hemengo arraza, ardi latxa, babesten laguntzeko.
Izan ere, ardi latxa oinarri izan duen ohiko artzaintza, herrialde honetako paisaiari halako forma berezia eman dion jarduera hori, arriskuan jarri du arraza artifizialekin lotutako sistema industrializatuen sarrerak; sistema horietan, ukuiluan daude ardiak denbora guztian, esne-produkzioa handitzeko.
Bere misioan, artzain gazteek osatutako Etxola elkartearen eta beteranoen Artzain Kontseiluaren laguntza izango du Arkidek. Hitzarmen batzuk ere egin ditu, tartean Felix Rodríguez de la Fuente Fundazioarekin edo Basque Culinary Centerrekin.
Ternua kamiseta
Irudi berriaren lehen euskarriak autoetarako eranskailu ezaguna eta Ternua markaren babesean salduko den diseinuaren elastiko bat dira.
Euskarri berri horiek webgune berrian eskura daitezke: www.latxakluba.org; Facebook-en ere badago. Gainera, Ardilatxaren produktuen salmentan eta jardueretan parte hartu nahi duten guztiek Ardi Latxaren Lagunen Klubeko kide egiteko aukera dute bertan.