6.250 bazkide ditu egun Fagor Taldeak eta gehiengo zabalak onartu du soldatak jaistea, %76k, krisiari aurre egiten laguntzeko neurri moduan. Fagor Etxetresna Elektrikoak eta Fagor Elektronika dira taldea osatzen duten zortzi lantegien artetik egoera zailena pairatzen ari direnak eta horietan, hain justu, jaso du proposamenak babes handiena: %90,5 eta %87 aldeko boto, hurrenez hurren.
Soldata jaitsiera ez da berdina izango lantegi denetan, krisiak gogorren kolpatu dituenetan beherakada handiagoa izango da gainerakoetan baino. Hala, Etxetresna Elektrikoetako eta Elektronikako bazkideek onartu dute euren soldatak %7,57 eta %8,81 jaistea; gainontzekoetakoek (Fagor Arrasate, Fagor Industrial, Fagor Ederlan, Fagor Automation, Copreci eta Mondragon Assembly), %5, 2012ko maiatzetik 2013ko apirilera. Lehendabiziko bietan, 15 eta 2,5 milioi euroko laguntza jasoko dute taldeko beste lantegietatik.
"Beste elkartasun keinu bat"
Fagor Taldeko iturrien arabera, bazkideek erakutsitakoa "elkartasun keinu bat gehiago" da, izan ere, ez da aparteko ordainsariei uko egitea edo soldatak jaistea onartzen duten lehen aldia. Lantegi batzuk, gainera, nahiko ondo ari dira aurre egiten krisiari eta, horietan soldatak jaistea ezinbestekoa ez bada ere, euren soldatetan ere jaitsiera aplikatzea onartu dute taldeko beste lantegiei laguntzeko helburuarekin.
Etxetresna Elektrikoak
Fagor Etxetresna Elektrikoetakoetako langile talde bat (administrazioan eta ingeniaritza alorren dihardutenak, bereziki) enplegu erregulazioko espediente batean murgilduta dago; aurreko hilean hartu zuten erabakia eta asmoa da irail bukaerara arte egotea indarrean. 80 langile, bestalde, lantegitik irtengo dira, aurretiko erretiroen bitartez.