Martitzenean hasi zen Euspot lehiaketako sari-banaketarekin eta atzo, eguena, amaitu zen aurtengo Huhezinema, Euskal Film Laburren V. Jaialdia. Aurrez epaimahaiak aukeratutako 10 finalisten lanak erakutsi zituzten Aretxabaletako Arkupe kultura etxean eta ondoren egin zen sari-banaketa ekitaldia. Eguaztenean, berriz, ikasleen lehiaketara aurkeztutako dokumental eta fikziozko lanak erakutsi zituzten Huhezin eta Asier Altuna zinegilearen hitzaldia izan zen ondoren.
Epaimahaiak hala erabakita, Ekaitza film laburrarentzat izan da aurtengo Euskarazko Film Labur Onenaren saria (Goiena saria); 1.000 euro jaso ditu Alberto Gastesi zuzendariak. Donostia euritsu eta hotz batean kokatua dago filma, eta neska eta mutil bat kalean gurutzatzean sortzen da istorioa.
Film Labur Onenaren saria eta Produkzio Onenarena (Eiken saria) film bakarrak jaso du, Haritz Zubillagaren She's lost control-ek. 600 euro eta urtebeteko Eikenerako bazkidetza kuota irabazi ditu.
Ikasleen lehiaketari dagokionez, epaimahaiak Maskarak filmari eman dio saria: 500 euro jaso dituzte Ander Bolibarrek, Ariane Irazustak, Miren Ormazabalek eta Oihan Vitoriak.
Publikoaren sariak
Ikusleek hiru sari banatu dituzte. Lehiaketa ofizialeko laburren artean ikusleek aukeratu dutena Zeinek gehiago iraun filma izan da, Gregorio Murorena. 400 euro eta Patez Zubia saskia jaso ditu.
Ikasleen lanen dagokienez, bi sari eman dituzte ikusleek. Dokumental onenaren saria Maskarak lanak jaso du; labur onenarena, berriz, Ohartxoak lanarendako izan da.
Epaimahaia
Aitor Gutierrez eta Maialen Sarasua errealizatzaileek, Beñat Sarasola idazleak eta Miguel Gomez-Tejedor ekoizleak osatu dute aurtengo epaimahaia.