.jpg)
Debagoieneko Mankomunitateak hondakinen gaineko formazio saioak antolatu ditu bailarako hautetsiendako eta Zero zabor taldeetako kideendako.
Lehen saioa, teorikoa
Hiru saio aurreikusi dituzte eta lehenengoa aurreko zapatuan egin zuten, Antzuolako Torresoroan. Saio hartan formazio teorikoa jaso zuten han batutako Bildu, EAJ eta Aralarko hautetsiek eta baita Zero zabor taldeko kideek ere. 60 bat batu ziren.
Alde batetik, gaur egun hondakinekin dagoen arazoaz jardun zuen Garbitania enpresako ordezkari batek. Garbitania, hondakinak gaika bildu eta kudeatzeko baliabideak ahalik eta gehien optimizatuz, udalerriei zein mankomunitateei zerbitzua eskaintzen dien entitate publikoa da, Hernani, Usurbil eta Oiartzungo Udalek bultzatutakoa. Gaur egun Hernani eta Usurbilgo atez atezkoaz arduratzen da.
Bestetik, Antzuolan atez atekoa ezartzeko emandako urratsak azaldu zituzten. Azalpenok Pedro Iturbek, aurreko agintaldian Antzuolako alkate izandakoak, eta Markel Azkargortak, Antzuolako Udaleko teknikariak eman zituzten.
Bigarren eta hirugarren saioak, praktikoak
Bigarren eta hirugarren saioak praktikoagoak izango dira. Bigarrenean, atez-atekoa ezarrita dagoen herrietara bisita egingo dute, bilketa eta azpiegituren antolaketa bertatik bertara ezagutzeko. Hirugarrenean, hondakin kudeaketa plantak ezagutzeko bisitak egingo dituzte.