Markel Olano Diputatu nagusia, Carlos Ormazabal Garapen iraunkorreko diputatua, eta Odon Elortza Donostiako alkatea izan dira. Haiekin batera, hondakinen partzuergoko kideak, Zubietako erraustegiarekin bat egiten duten eskualdeetako ordezkariak. Eta baita errauskailua eraikiko diten enpresako kideak ere.
Arduratsu eta eskuzabal
Elortzak azpimarratu du Donostiak arduratsu eta eskuzabal jokatu duela, "beste inork ez zuelako errauste planta beren lurretan" kokatu nahi. Era berean, etorkizuneko errauste planta lehen mailako planta izan dadin egindako ahalegina nabarmendu du. "Europar Batasunak eskatzen dituen neurri zorrotzenak" beteko dituela esan du, partikula kutsagarriak airera isuri ez ditzan.
Elortzak aitortu du donostiar guztiak ez daudela errauste plantarekin ados eta iritzi publikoa zatituta dagoela. Zentzu horretan, esan du Donostiako Udalak 2.000 donostiarren artean egindako inkesta baten arabera, %42,2 errauste plantaren alde dagoela, %27 aurka, eta beste %30ek ez duela erantzun.
Hondakindegirik ez
Markel Olanok esan du, joan zen urtean jaitsi egin zela hondakin kopurua Gipuzkoan. 410.000 tona hondakin sortu zela. Horietatik, 230.000 tona, hondakindegietara joan zirela. Eta gogora ekarri du errauste plantarekin aurrerantzean hiri zaborrak hondakindegietara eroan beharrean erre egingo direla eta, hala, "hondakinen kudeaketaren zikloa egoki itxi egingo dela".
Azkenik, Diputatu nagusia zorioneko agertu da erakunde ezberdinak eskutik doazelako proiektu honetan eta helburu moduan jarri du etorkizunean %60ko birziklatze mailara iristea Gipuzkoan. Debagoieneko Mankomunitateak atez atekoaren aldeko hautua egin du eta errauste plantaren aurka dago.
Errauskailuarekin batera, biosikatze planta bat ere eraikiko dute Zubietan.
Bankuen esku
Rebeka Uberak, Aralarren Batzar Nagusietako eledunak, eta Ainhoa Beolak, Donostiako udalekoak, Zubietako errauste plantaren lehen harria jartzeko ekitaldia kritikatu dute. Uberaren esanetan, "Gipuzkoako erakundeen etorkizuna errausteko planta finantzatuko duten erakundeen esku uzteko lehen urratsa izan da".
Uberak esan du "hemen bigarren mailan" geratzen direla ingurumena eta osasuna eta "irabazien esku" geratu direla.