Bergarako San Martin, Aranzadi eta Mariaren Lagundia ikastetxeetako ikasleak, Antzuolakoak eta Elgetakoak elkartu ziren, benjamin eta kimuen mailetako 150 umetik gora, hain zuzen. Begiraleen azalpenei adi-adi jarraitu eta jokatzeko beldur barik kantxaratu ziren guztiak. Ezintasunak dituztenei egokitutako saskibaloian, boccian –pilota zuria jotzea– eta goal-ballean –begiak itxita zaratadun baloiarekin golak sartzea– jardun zuten. Boccian jokatzeko, gainera, Dordoka kirol elkarteko kide bi izan zituzten lagun, arauak azaldu eta jokoari jarraipena egiten. "Asko laguntzen digute horiek eta gainera, seriotasuna ematen diote jokoari", azaldu zuen Josu Agirrezabal begiraleak. Bocciako jokalari Agustin Toledo Lleidara joango da aste bukaeran Euskadiko selekzioarekin txapelketa jokatzera.
Gurpildun aulkietan saskibaloian jardutea izan zen gaztetxoen gustuko, baina egokitutako kirol horietan ondo jokatzea ez dela batere samurra frogatu zuten.