Legebiltzarrak ere azkenean aurrera aterako du bere tabakoaren legea, orain hilabete Estatuan indarrean sartutakoaren antzerakoa baina zenbait galarazpen gehiagorekin datorrena. Hasteko, futbol zelaietan, aire libreko eremuak izanda ere, leku berezietan erre ahalko da bakarrik. Ikuskizun publikoak egiten diren aire libreko lekuetan ere ezingo da erre adin txikikoentzat izaten baldin bada ikuskizuna.
Jaurlaritzako talde guztien babesa jaso du legeak UPyD-rena salbu.
Adin txikikoentzat bada, debekatuta
Hala, Estatukoak ez bezala, Euskadiko legeak aire libreko kirol eremuetan edo ikuskizun publikoetan erretzea debekatzen du erabat baldin eta kirol jarduera hori nagusiki adin txikikoei zuzendua egoten bada eta bestela, hau da, kirol jarduera adinez nagusientzako bada, soilik erre ahalko da horretarako zehaztutako lekuetan.
Erabakia,azkenean, instalazioen jabeen esku
Hala ere, ez da galarazpen argi eta garbia ze Celina Cepedak, Drogomenpekotasunen Zuzendariak, adierazi du horrek ez duela esan gura erretzeko eremuak ipintzen ez dituzten zelaietan debekatuta egongo dela erretzea, soilik “eztabaida hori izateko aukerari bidea irekitzen” zaiola ze “lege baten helburua ez da ohitura bat egun batetik bestera aldatzea”. Izan ere, lege honen arabera, zelaiaren ala instalazioen jabeek erabaki ahalko dute eremu osoa dela erretzeko gunea eta gauzak dauden moduan laga. Hala ere, legeak ez du zehazten galarazpena edo baimena nola egin behar den, kartelen bitartez, administratiboki edota seinalizazioaren bitartez.
Muga berriak ezartzera badator ere, legebiltzarrak onartu berri duen lege hau Lopezen gobernuaren hasiera bateko asmoa baino leunagoa da. Euskadiko Gobernuak autoetan erretzea galarazi gura zuen umeak egonez gero edota gasolindegietan salmenta debekatzea.