Desprezio Soraluze eta Bergarako taldekideek osatzen dute eta punk-rocka egiten dute, Xarmakoak ondarrutarrak eta Berrizkoak dira eta rocka da beraien musika estiloa. Lord Witch-ekoak, ostera, power metal eta heavy metal melodikoa landuko dute taula gainean. Taldekideek esan digute sorpresak emango dizkigutela oholtzan daudenean eta onena ematera doazela.
Gauari amaiera borobila emateko, berriz, Atom Rhumbakoek euren azken lana zuzenean aurkeztuko dute.
Guztira, 18 talde
Guztira Danbakako laugarren edizioan 18 talde igaro dira eszenatokitik eta hainbat musika estilo entzuteko aukera izan dugu urriaren 22tik abenduaren 17ra bitartean. Saria zein taldek jasoko duen jakiteko, baina, ez dugu gehiago itxaron beharko; gaur gaueko finalean erabakiko da.
Sariak
Talde onenak disko bat grabatu eta kaleratuko du eta Debagoieneko talde onenak, berriz, bideoklipa grabatuko du.
Eta ikus-entzuleendako sariak ere izango dira, tartean, Laino Skate park-en eskutik snow taula bat eta Laino Skate parkera urtebeteko sarrera doan.
Hori guztia eta gehiago, gaur gauean Elgetako Espaloian gaueko 22:30etatik aurrera izango da.