Abenduan, tabakoaren kontrako legea indarrean jarri aurretik, hasi ziren erretzaileak erretzeari uzten laguntzeko metodoei buruz galdezka farmazietan. Debagoienekoetan kontatu digutenez, mugimendua ez da handia oraindik, baina dagoeneko hasi dira zigarro elektronikoak, pastillak edota txikleak saltzen.
Zigarro elektronikoa
Zigarro elektronikoa da erretzeari uzten laguntzeko merkaturatu duten azken produktua eta ateratzen duen lurrinaren bidez, zigarroa erretzean sentitzen den sentsazioa nabaritzen da.
Pastillak, eraginkorrenak
Zigarro elektronikoaz gain, aspalditik ezagutzen ditugun txikle eta bestelakoak ere saltzen dituzte, baina guztietan eraginkorrena pastillak direla dio Maria Vitoria Anituak, Anitua farmaziako buruak. Hala ere, horiek hartzeko beharrezkoa da medikuaren jarraipena.
Kostua
Erretzeari uzteko pastillak 70 euro inguru balio dute, eta beste hainbeste zigarro elektronikoak; horri, baina, 10-12 euro gehitu behar zaizkio, aldatzen den kartutxo bakoitzeko. Hasiera batean prezio horiek garestiak iruditzen zaizkigu baina Anituak ez dela hala erakutsi nahi izan digu. Horretarako, adibide batzuk jarri ditu: egunero zigarro pakete bat erretzean 111 euro gastatuko ditugu hilean eta 5 urtetan kostua 6.700 eurora igoko litzateke.
Garrantzitsuena, borondatea
Produktuon laguntza ondo datorren arren, garrantzitsuena erretzeari uzteko borondatea da Anituaren esanetan.