Iaz baino eguraldi hobearekin –haize zakarra, euria zein txingorra izan ziren protagonista iaz– baina blai eginda amaitu zuten atzo Behobia-Donostia lasterketan helmugara ailegatu ziren 17.374 korrikalariek. Euriak eta beriziki haizeak are gogorragoak egin zituen ibilbidearen 20 kilometro eta 400 metroak.
Proba gogorra izan zen oso eta albiste tamalgarri bat ere utzi zuen: 40 urteko korrikalari bizkaitar bat hil egin zen; Zurriolako etorbidean zerraldo erori zen arazo kardiobaskularrek eragindako bihotzekoak jota. Anbulantzia korrikalaria suspertzen saiatu zen behin eta berriz baina ezin izan zuten ezer egin. Aurtengoa lasterketan parte hartzen zuen seigarren aldia zen. Horrez gain, ez zen bestelako gertakari aipagarririk gertatu.
Lasterketa, markak hausten
Lasterketa osoko parte-hartzeak markak hautsi ditu aurten, eta izenematean 20.000 lasterkarien muga gainditzea lortu da aurten.
Debagoienak ere markak hautsi ditu: 472 debagoiendar iritsi ziren Boulervadeko helmugara, iaz baino 33 gehiago. Ibarreko parte-hartzearen gorakada ulertzekoa da azken hilabeteotan bailarako lasterketek izan duten boom-a ikusita.
Debagoieneko mutil onenak
Debagoiendarren markak ez ziren nolanahikoak izan. Denetan azkarrena Imanol Molinero oñatiarra izan zen. Gainera, Molinerok marka pertsonala apurtzea lortu zuen: 1:08:48ko denbora egin zuen helmugan. Haren atzetik sartu ziren Asier Urdanpilleta eta Ritxar de Goñi. Molinero pozik zegoen, eta adierazi zigun marka hobetzeko gogor entrenatu duela aurtengoan. Helmugan bertan, gainerako debagoiendarren zoriona jaso zuen. Urdanpilleta ere pozik zegoen. Gainera, gustuko izan zuen eguraldia atzokoan. Esan zuen, baina, azken kilometroetan giharrak mindu egin zitzaizkiola. De Goñi bergararra ere pozik zegoen markarekin: ordubete eta hamar minutu baino gutxiago egin gura zituen, eta lortu zuen. Arkaitz Ruiz de Loizagarekin batera hasi zuen lasterketa; gero, bakoitzak bere erritmoa hartu zuen.
Helmugan sartzen laugarren debagoiendarra Aritz Kortabarria arrasatearra izan zen. Kortabarriak Jose Gabriel Urizar euskal presoaren izenean egin zuen antxintxika.
Neskak, indartsu
Debagoieneko neskei dagokienez, Arrasateko Rakel Alonsok egin zuen marka onena: 1:30:17. Itziar Aldekoa eta Lidia Gonzalez izan zien hurrenak. Gonzalez oñatiarra lasai asko sartu zen helmugara. "Hirugarren urtea da, eta datorren urtean ere errepikatzeko asmoa daukat", esan zuen. Errepide bazterrean egoten diren ikusleen animoak izugarriak direla eta asko laguntzen dutela gaineratu zuen. Izan ere, ibilbide osoan zehar ikusleak izateak egiten du ezberdina Behobia-Donostia.
Iglesias, Martinezen aurretik
Debagoieneko protagonistez gain, elite mailan Rafa Iglesias izan zen nagusi (01:01:10). Iglesias eta Txema Martinez ziren faborito; proba aurretik biek adierazi zuten Alberto Juzdadoren errekorra (59:19) apurtzera zihoazela. Mirakrutzeko gainan erabaki zen lasterketa; portuan gora egin zuen ihes Iglesiasek eta 2005etik 2008ra probako azkarrena izan den korrikalari madrildarra atzean utzi zuen. Helmugan 50 segundo galdu zituen Martinezek (01:02:00).
Emakumezkoetan Maria Lopez de Tejada izan zen azkarrena (01:15:10). Hala ere, lasterketako bitxikeria etiopiarren eskutik etorri zen. Utopia etiopia ekimena dela-eta etorri ziren, Afrikako umeei laguntzeko asmoz. Bada, gizonezkoei gertatu bezala, beharrezkoak diren txipak beste oinetako batzuetan utzi eta ez zuten elitekoekin irteterik izan. Hala ere, euren denborak Rocio Rios-ek 1998an jarritako errekorraren azpitik izan ziren (01:08:54): Tigsti Gebreselassie-k 01:08:34 behar izan zituen eta Tehas Gebre-k, aldiz, 01:08:37. Txipa ahazteak ekidin du, beraz, errekor berria emakumezkoetan.
Sailkapena
Gizonezkoak
- Imanol Molinero 01:08:48
- Asier Urdanpileta 01:09:27
- Ricardo de Goñi 01:09:57
- Jose Gabriel Urizar 01:10:20
- Arkaitz Ruiz de Loizaga 01:11:00
- Iker Herran 01:12:23
- Kepa Varela 01:12:25
- Joxu Arana 01:12:57
- Xabier Elkoro 01:13:30
- Igor Lazkano 01:13:37
Emakumezkoak
- Rakel Alonso 01:30:17
- Itziar Aldekoa 01:31:24
- Lidia Gonzalez 01:32:36
- Amaia Bernal 01:33:40
- Saioa Ugidos Danboriena 01:34:15
- Trini Blazquez 01:36:05
- Ana Isabel Urmeneta 01:36:19
- Izar Urteaga Mendizabal 01:38:04
- Leire Guenetxea Mondragon 01:38:21
- Maria Jesus 01:38:28