Italiako iparraldean dagoen Val di Susa haraneko ia biztanleria osoak bat egin du Abiadura Handiko Trenaren kontrako borrokarekin. Orain 15-16 eman zituzten lehen urratsak. Gutxi batzuk baino ez ziren orduan azpiegituraren kontrako jarrera zutenak; gaur 60.000 inguru dira.
Kalteak osasunean, ingurumenean, ekonomian eta politikan
Arrazoi ezberdinak daude tartean, esaterako, osasunari dagozkionak: Val di Susako mendiek amiantoa eta uranioa dituzte, lur horiek mugitzen badira sustantzia horiek hedatu egingo dira aire bitartez, eta horrek osasun arazoak eragingo ditu. Ingurumen ikuspegitik begiratuta ere triskantza handia suposatu luke, haran estua delako oso. Ekonomikoki, jasanezina litzatekeela uste dute, eta politikoki, ez datoz bat azpiegitura honek berekin dakarren garapen modeloarekin. Arrazoi horiek guztiek pentsamolde ezberdinetako jendea batzea lortu dute.
Garaipena lortu dutela diote, momentuz behintzat proiektua geldirik dagoelako.
Hitzaldiak
Egunotan hitzaldiak ematen dabiltza Euskal Herrian barna, eta zapatuan Donostian egingo den manifestazioan ere izango dute hitza. Manifestazioa 17:30ean aterako da Anoetatik, "mila arrazoi ditugu AHT gelditzeko" lelopean. Manifestazio amaieran rock maratoia izango da Musikherria disketxeak antolatuta. Ibarretik autobusak aterako dira.