Lan taldea, ekoizpena eta salmentak bikoiztu ditu Fagorrek Frantzian liderra den Brandt enpresa erosita. Sektoreko bost konpainia ahaltsuenen artean dago orain.
Fagorrek 162,5 milioi eurotan erosi du Brandten %90; aurretik berea zuen %10. Kapital propioaz gain, MCCren baliabideak (ordaindutakoaren %18) eta kanpoko kredituak (%55) erabili ditu erosketarako, eta astearteaz geroztik, lantegiak dauzka Europan, Asian eta Afrikan.
Salmentak eta ekoizpenak gora
Urtero zazpi milioi etxetresna baino gehiago ekoitziko ditu talde jaio berriak, eta lanak hartuko ditu Fagorren eta Brandten arteko elkarlana pizteko.
Fagorrek 16,8 milioi euro irabazi zituen iaz. Hurrengo hiru urteetan, gainera, 8.300 milioi euroren salmentak lortu nahi ditu.
Kostuak gutxitu baina ez lan baldintzen kontura
Ikerkuntza eta berrikuntzan inbertitzen jarraituko du Fagorrek, eta funtsezkoa deritzo kostuak gutxitzeari, baina ez lan baldintzen kontura. Adierazi dutenez, ez dute lantegirik itxiko eta ez dira hemendik joango.
Berrikuntzaren bitartez lehiatuko da Europa Ekialdean eta Asian merkeago ekoizten duten konpainiekin. Aurten, %3 inguru garestituko ditu etxetresnak Fagorren, Poloniara eramango du gama apaleko produktu batzuen ekoizpena, eta Txinako plataforma erabiliko du lehengaietan dirutza aurrezteko.