Danbaka da lehiaketaren izena eta bertan Debagoieneko pop, rock, punk, hard-core, hip-hop, elektronika, jazz, folk, hau da, estilo askotariko talde edo bakarlariek hartu ahal izango dute parte.
Urriaren 22an hasiko da lehiaketa eta lehen fasea abenduaren 17ra arte luzatuko da. Ondoren, finala jokatuko da datorren urteko urtarrilaren 14an.
Zuzenekoak Espaloian
Talde edo bakarlarien zuzeneko saioak izango dira epaimahaiak baloratzeko modua. Zuzeneko emanaldiok ostiraletan 22:30ean izango dira Elgetako Espaloia kafe Antzokian. Zuzeneko emanaldiok Goiena Telebistak grabatuko ditu oso-osorik eta, gero, astean barrena emango ditu, ikus-entzuleei SMS bidez mezuak bidaltzeko aukera eskainiz.
Informazioa Goienako hedabideetan
Bestalde, Asteleheneko Goienkaria-k taldeen fitxa, elkarrizketa eta emanaldiaren kronika argitaratuko ditu eta animatuko ditu irakurleak SMS mezuak bidaltzera. Ostiraleko Goienkaria-n, Goiena.net-en eta Arrasate Irratian ere egingo zaio jarraipena lehiaketari.
Goiena.net-en dituzu lehiaketaren oinarriak, sariak, epaimahaia eta beste hainbat informazio.