Debagoienera ere datozen egunotan iritsiko da txertaketa kanpaina. Hain zuzen ere, herri batzuetan egubakoitzean, hilak 17, eta besteetan astelehenean, 20, zabalduko da txertoa hartzeko epea. Horretarako nahikoa asti izango dute ibarrekoek, urriaren 31 arte, hain zuzen.
Kanpaina herritar guztioi dago zuzenduta, baina bereziki 65 urtetik gorakoei eta gaixotasun kronikoak diabetesa, hipertentsioa, edo bihotz, birika edo giltzurruneko gaitzak, besteak beste dituzten guztioi.
Txanda hartu
Txertoa hartzeko, norberak bere herriko anbulatoriora deitu eta txanda hartu beharko du; hala ere, 65 urtetik gorakoak zuzenean joan daitezke. Gainera, Arrasaten eta Bergaran, anbulatorioaz gain, beste leku batzuetan ere emango dute txertoa, erretiratuen egoitzak kasu. Bestalde, ezinduek etxean hartu ahal izango dute txertoa.