Xabier Sarasua eta Jose Anjel Antxia Aretxabaletako zinegotziak eta Iñigo Iñurrategi Bergarako zinegotzia izan dira prentsaurrekoan. Euren esanetan, bailarako baserritarrendako galera handia litzateke Zubillagako hiltegiak eskaintzen dien zerbitzua galtzea.
Ixteko emandako arrazoietan akatsak
Mankomunitateak ixteko eman zituen arrazoiak aztertu eta datuak kontrastatu ditu Aralar alderdiak, eta ez dator bat hainbat puntutan. Hona Aralarrek dioena:
- Gutxienez datorren urtera arte hiltegiak baimen tekniko-sanitario guztiak dituela.
- Arazo teknikoak dituelako argudiatzeko Mankomunitateko Gobernu Batzarrari aurkeztutako txostenak hainbat akats dituela.
- Maila bereko inguruko hiltegiekin konparatuta Zubillagakoaren baldintzak oso onak direla.
- Hiltegiaren diru kontuak aztertu ondoren, hasieran esandako galera ekonomiko handiak zalantzan jartzen dituela. Hiltegiaren gaineko bideragarritasunarengan sortutako zalantzek kostu batzuen (pertsonal gastua) sekulako igoera sortu dutela.
- Eusko Jaurlaritzak errentagarritasun ataria 10.000 tonatan jarri arren (Zubillagakoa 2.000 tona ingurukoa da), 1.000tik beherako ekoizpena duten eta errentagarriak diren hainbat proiektu daudela.
Aralarren eskaera
Hori jakinda azken Gobernu Batzarraren aurrean zera esan zuen Aralarrek:
- Hiltegiaren bideragarritasunaren gaineko proposamenak egiteko jarritako epea luzatzeko.
- Bideragarritasun proposamenak lantzeko behar den informazioa, laguntza eta erraztasunak izan ditzala gaia landu gura duenak. Proiektuak elkarlanean landu behar direla, sektorearen inplikazio eta konpromisoarekin eta erakunde publikoen esku hartzearekin.
- Eusko Jaurlaritzak ardura zuzena du gai honetan eta politika aldatu beharra duela.
Horrez gain, Mankomunitateari baserriaren inguruan hausnarketa egin beharra dagoela adierazi zion Aralarrek.