Mendi eskola
Bestetik, Fundazioak esku artean darabilen proiektuen berri ematen zaigu. Berripaperei esker jakin ahal izan dugu Felix Iñurrategi mendi eskolako eraikuntza berria eginda dagoela; altzariz hornitzea baino ez da geratzen.
Jakin dugu, bestalde, Adolfo Madinabeitia izango dela aurten mendiko trebakuntza ikastaroak emateko arduraduna. Pakistanen da dagoeneko Madinabeitia. Hala ere, ez da bakarrik joan eta Euskal Herriko mendizaleek emandako materialez betetako hainbat kargu eraman ditu; hirurehun kilo pasa.
Matxulu urez hornitzeko proiektua
Proiektu hori ere martxan da eta errekatik herriraino ura eramango duen hoditeria muntatzeko lanak ikus daitezke argazkietan. Punpak otsailerako Matxulun izango dira eta aurtengo udarako martxan beharko luke lehen zatiak.
Txosten txukuna eta mamitsua da fundaziokideek argitaratu dutena. Euskaraz eta gazteleraz idatzia, eta argazki eta grafiko ugariz hornitua.