Bi azpiegitura garrantzitsu ditugu martxan Debagoienean: Eibar-Gasteiz autobidea eta Beasain-Durango autobia. Bi errepide horiek bat egingo dute Bergaran, Zaldumendin, hain zuzen ere. Zaldumenditik Arrasateko Epeleraino, hain zuzen ere, egingo dute bat autobiak eta autobideak: 3,5 kilometro izango ditu, guztira, zati horrek. Horrek esan nahi du Bergaratik Arrasatera joateko ordaindu egin beharko dugula. Oraindik zehaztu ez dutena da zenbat ordaindu beharko dugun autobideko kilometro bakoitzeko. Beste aukera bat, noski, Zaldumendi parean errepide zaharrera irtetea izango da.
Donostiatik Gasteizera, motzagoa
Behin autobidea eta autobia egiten dituztenean, Donostiatik Gasteizera joatea 15 kilometro motzagoa izango da Debagoienetik, Etxegaratetik baino. Hau da, Donostiatik Arrasateraino N1 errepidea eta Beasain-Durango autobia erabiliz, eta handik aurrera, berriz, Eibar-Gasteiz autobidea hartuta. Horrela, automobil askok aukera hori egingo dute eta trafikoa areagotuko da Debagoienean.