Mugikortasun mahaia sortuko dute Bergaran

Maialen Torres 2014ko abe. 19a, 12:00

Eguazteneko VI. Kirol kontseiluan, motorizatu gabeko bideak izan zituzten hizpide, martxan diren proiektuak azaldu zituzten udal ordezkariek eta euren ekarpena egitera gerturatutako hainbat herritarrek, Itziar jauregian.

Orain arte egindako proiektuen azalpenarekin ekin zioten bilerari. Batetik, iragarri zuten Antzulatik Bergarako sarrerara eta Elorregitik Labegaraietara doazen bidegorri zatiak maiatzerako amaituko dituztela. Hori bai, bigarren tarte horren azken 500 metroek denbora gehiago hartuko dute, tartean lurren desjabetzea egin behar delako. Bestetik, gogora ekarri zuten azoka pareko bidegorri zatia ere amaitzear dela, eta era beran, hamar bizikleta aparkaleku berri jarri dituztela herritarren esku.

Etorkizunari ere begiratu zioten, bi proiektu berri aurkeztuz. Lehenak herriaren sarreratik autobus geltokirako bidea egingo du, eta besteak, berriz, herria zeharkatuko du, Gihartsu gimnasiotik, San Lorentzoraino. Proiektuen dimentsioa ikusita, lehentasunak finkatzea ezinbestekotzat jo du Ugarteburuk, baliabideak "mugatuak" direlako.

Mugikortasun mahaia

Orain arte kirol eta hirigintza arloetako ordezkariek, udaltzaingoarekin elkarlanean landu dute gai hori, baina aurrerantzean lanean jarraitzeko, mugikortasun mahaia sortzea erabaki dute. Gainera, bilera horietan ordezkaritza zabalagoa biltzeko asmoa dute, eta besteak beste, ingurumen, turismo, hezkuntza, obra eta zerbitzuetako ordezkariak batuko zaizkio lan taldeari. 

Parte hartze irekia

Mugikortasun mahaia martxan jartzen denean, arlo horretako proiektu guztiak bilduko dituen plana aurkezteko asmoa dute. Plan hori, ordea, "irekia" izango da, Ugarteburuk azaldu duenez. Izan ere, ez dute Udalaren ikuspuntuarekin bakarrik aurrera egin nahi, eta horregatik, oraindik nola egingo duten zehaztu ez badute ere, herritarren ideiak bilduko dituzte. Kontseiluan bertan ere jaso zituzten ekarpenak, eta besteak beste, seinalizazioari, araudiari, eta bidegorrien diseinuari buruz aritu ziren.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak