Bileraren ostean lantegiko atean eseri dira langileak, Candyko zuzendariei irteera oztopatzeko. Ez da istilurik izan, baina enpresako ordezkariek langileen oihu artean egin dute kanporako bidea.
Datorren egubakoitzean egingo dute laugarren batzarra zuzendaritzarekin. Langileek argi dute, langabezia prestaziorik ez duten langile horiei irtenbide bat eman arte ez dutela amore emango.
Erakundeak irtenbide bila
Bestetik, erakundeek ere badihardute Candyren itxierari konponbide bat bilatu guran. Gipuzkoako Foru Aldundia, itxieraren aurrean zein irtenbide egon daitezkeen aztertuko duen aholkulari batekin dago harremanetan. Pedro Iturberen, Lurralde garapenerako zuzendariaren hitzetan, Foru Aldundiak enplegua mantentzearen alde egingo du eta bide horretan aukera guztiak aztertu. Candyren orain arteko aktibitatea mantentzerik ez badago, beste aktibitate baten sorreran ipiniko ditu Aldundiak indar guztiak.
Eusko Jaurlaritzak ere bide beretik egin du. Izan ere, Candyrendako konponbide bila jarraitzeko asmoa berretsi du. Hala adierazi zuen atzo Arantza Tapia ekonomia sailburuak Garagartzako Fagorren lantegira egindako bisitan.