Smartphonentzako egin den garapen berritzaile honekin, ikastetxearen informazio guztia mugikorrean aurkitu ahalko da, bai smartphonentzako egokituriko webgune moduan, baita APP formatuan ere. Besteak beste Institutuaren eskaintza akademikoari eta zerbitzuei buruzko informazioa eskuratu ahalko da aplikazio honekin, baita, esaterako, egutegia ere.
Informazioa euskaraz eta gazteleraz egongo da, eta doan egongo da eskuragarri bai Google Playn (lehengo Android Marketen), baita Apple Storen ere. Esan behar da gainera, Miguel Altuna Institutua dela bere eskaintza smartphonerako egokitzen duen eta Android Marketen agertzen den Estatuko lehenengo Lanbide Heziketa zentroa.
Aplikazio hau smartphonera jaisteko hainbat bide daude: Institutuko bluetootharen bidez, QRa erabilita edo helbide honetan sartuta. Batura Mobile Solutionseko Gotzon Arzelusek eta Miguel Altuna Institutuko Joxu Aranak aplikazio honen aurkezpenean esan dutenez, aurretik zegoen teknologiaz baliatu dira berau garatzeko, eta smartphoneak izaten ari diren zabalkundea ere azpimarratu dute.