Alderdi sozialistak aurka bozkatu zuen eta hondakinen kudeaketari buruz duen iritzia plazaratu du orain, prentsa ohar baten bidez. Bergarako PSE-EEk dio Gipuzkoan sistema horrekiko esperientzia "oso txarrak" ari direla izaten, eta Antzuolako herritarrek jarri omen dituzten kexak ipintzen ditu horren adibide moduan.
Bilketa sistema hori estetikoki “zakarra” izateaz gain, ez dela praktikoa dio alderdi sozialistak, hondakin mota bakoitza ateratzeko egun zehatz bat dagoelako. Gainera, atez atekoak herritarrek zaborra beste herri batzuetara eramatea dakarrela ere badio. Bestalde, gaineratzen du sistema horrek orain arte edukiontzietan eginiko inbertsioa alferrik galtzea dakarrela eta altzari berriak eskuratzea eskatzen duela. Bizi dugun krisi ekonomikoa kontuan hartuta, alderdi sozialistak ez du ikusten sistema horren aldeko apustua egitea kudeaketa eraginkorraren eredu moduan, dirua xahutzea iruditzen zaio.
Horregatik guztiagatik, Bergarako alderdi sozialistak errefusatu egiten du atez ateko bilketa sistema.