Eraikineko fatxada berrituko dute eta hainbat konponketa egingo dituzte barruan, auditorioa eta ikastolako lan berriekin batera. Gainera, patioa Udalak erosi du aparkalekuak egiteko.
Juanjo Alvarez Unedeko zuzendariak azaldu duenez, "Lagapen honek bi baldintza nagusi ditu: Unedek Bergaran jarraitzea eta eraikina hezkuntzarako eta kulturarako erabiltzea. Horregatik, Unedek eta Aranzadi ikastolak bertan jarraituko dute eta hirugarren zatia udalak erabiliko du auditorioa egiteko".
Eraikina berrituko dute
Eraikina patronatuaren esku egonda, zati bakoitza erabiltzeko lanak hasiko dituzte. Kanpotik begiratuta, eraikinaren fatxada eta arkupeak berrituko dituzte eta ikastolak sarrera berri bat izango du Munibe plazatik, pasabide bat eginez.
Barruko aldaketak ere handiak izango dira. "Unedek erabiliko duen gunean, adibidez, gela handiekin txikiak egingo ditugu, komun berriak egingo ditugu, igogailua jarriko dugu, liburutegi berria eta beste solairu bat izango du eta eraikin osoan wifi sistema sartuko dugu. Gero eta ikasle gehiago ditugu eta lan hauek ikastetxearen eskaintza sendotuko dute", dio Juanjo Alvarezek.
Auditorioa egiteko, berriz, erretaula atzera botako dute. "500 lagunendako tokia izango du eta proiektua irailaren 15erako entregatuko dute", dio Victoriano Gallastegi alkateak. Hori egiteko, ikastolako gela batzuk erabiliko dituzte baina beste txoko bateko tokia hartuko du gero ikastolak. Lanak 2007an hasiko dituzte, auditorioaren proiektua aztertu eta gero.