Euskal Herriak biziraun eta garatzeko lehentasuna duten egitasmoak zein diren azalduko dute eta prozesu horretan parte hartzeak duen garrantziaz ere egingo dute berba.
Halaxe azaldu zuten Maite Aristegi eta Jose Luis Elkoro Nazio Garapen Biltzarreko kideek egubakoitzean Bergarako kultura etxean egindako prentsaurrekoan.
Nazio Garapen Biltzarra
Nazio Eztabaidagunetik eratorritako Nazio Garapen Biltzarra 50 lagunek osatzen dute eta Nazio Eztabaidaguneak hartutako erabaki estrategikoak kudeatzeko sortu zen. Herri eraikuntzarako bidean lehentasunak zehaztea dagokio Nazio Eztabaidaguneari, eta Nazio Garapen Biltzarra hori kudeatzeko eta aurrera eramateko tresna dela azaldu zuen Maite Aristegik.
Auzolandegi Nazionala
Nazio eraikuntzarako auzo lanaren beharra ere azpimarratu zuen Aristegik: "Auzolandegi Nazionala martxan jartzeko beharra ikusten dugu. Auzo lana beti egon da Euskal Herrian eta horregatik, hain justu, biziraun dute hainbat eta hainbat gauzak gurean. Herri eraikuntzari dagokionez ere, herritar soilok gure ekarpena egin dezakegu. Guztiok elkartuta lan eginez gero, ekarpen handia egin diezaiokegu gatazka konpontze honi". Horren ildora, herritarrak mintegira joateko dei egin zuen.