Saharan kanpamentuak eraiki zirela 30 urte bete dira gaur, otsailak 27, eta horixe gogoratzeko eta behingoz herri horren independentzia eskatzeko, jaialdia egin zuten Bergaran.
Bibi Andueza Bubisher talde antolatzaileko kideak adierazi zuenez, "Nazio Batuei eta Europako gobernuei adierazi behar zaie badela ordua aurpegia garbitzen aritu ostean postura argia hartu eta konpromisoa hartzeko. Eta Espainiako Gobernuari eskatu bere ardurak ez lagatzeko alde batera, hura baita Saharako herriaren sufrimenduaren arduraduna". Horrelako mezuak entzun ziren jaialdian zehar antolatzaileen aldetik, bai eta Gasteiz, Getxo, Leioa, Laudio eta Amurriotik etorri ziren sahararren aldetik ere.
Eskariak
"Gure lanaren ordainaz libre izan dadin Sahara" abestu zuen Eñaut Uriarte bergararrak ekitaldi politikoaren amaieran. Ildo beretik, Fronte Polisarioko ordezkari Mohamed Mamun A. Brahimek "gure kausarekiko elkartasuna da behar duguna", adierazi zuen. Sidi Mohamed Balla preso politikoak bidalitako gutuna ere irakurri zuten: "Marokoko erregeari presoak askatzeko eskatu nahi nioke eta eskerrak eman gure intifadaren alde egin zutenei", zioen gutunean.
Urteurreneko eguna dela-eta, kontzentrazioa deitu dute gaurko 19:30ean Euskal Herriko herri guztietan.