Bi urteko kudeaketa lanen emaitza da hitzarmena. Hiru lagunek izenpetu dute: Fernando Oregik Tornilleria Debaren izenean, Gorka Aranegik Grupo Eibarren izenean, eta Victoriano Gallastegik Bergarako Udalaren izenean.
Mekolalden egokituko dute industria gune berria, garai batean Hijos de Arturo Narbaiza lantegia egondako lekuan. Grupo Eibar eragileak egingo ditu lanok.
Sinatzaileen ustez, hitzarmen honek zaharkituta geratu diren industria guneak suspertzeko eta herri barruko bizitegi-guneetan etxebizitzak eraikitzeko bidea emango du, Agenda 21-eko helburuak betetzen laguntzearekin batera.
Proiektuak
Mekolaldeko industria gunea prestatzea izango da lehen egitekoa, eta Grupo Eibarrekoek espero dute urtea amaitzerako lan horiek hasita izatea. Egun Tornilleria Deba dagoen lekuan, berriz, Ibilgailuen Azterketa Teknikoa egiten den inguru horretan, etxebizitzak egingo dituzte etorkizunean: 156 libreak eta 39 babes ofizialekoak.