Gabiria Dorrea berritzeko hitzarmena
Bergarako Udalak eta Tavexek Gabiria Dorrea berritzeko hitzarmena sinatu zuten aurreko egubakoitzean. Tavex taldeko Enrique Garranek eta Victoriano Gallastegi alkateak sinatu zuten.
Hitzarmenaren arabera, Tavexek San Antonion dituen langileen bulegoak bertan kokatuko dira. Gabiria Dorrea berritzeko lanak udazken aldera hasiko direla aurreratu zuen alkateak, prentsaurrean.
Berritze lanen kostua bien artean ordainduko dute
Udalaren eta Tavex enpresaren arteko akordioa gauzatu ondoren, langile horiek Gabiria Dorrean lan egingo dute etorkizunean. Administrazioak Dorrearen berritze lanen %50 ordainduko du eta beste erdia Tavex enpresak. Edozein modutan ere, Udalak jarraituko du dorrearen jabea izaten eta Tavexek epe jakin baterako izango du Gabiria Dorrea erabiltzeko eskubidea.
Etxebizitzak egingo dituzte
Atzo bertan Algodonera San Antonioko pabilioiak bertan behera botatzeko lanak hasi ziren. Lantegia zegoen tokian, etxebizitzak egingo dituzte etorkizunean. Tavex taldeak Adarra eraikuntza-enpresari saldu zion lursaila, 17.000 m2 guztira.
Monumentu kalifikatu izendapena du Gabiriak
Gabiria Dorrea XV. mendekoa da eta monumentu kalifikatu izendapena dauka, Jaurlaritzako Kultur Sailak ematen duen gorena. Teilatua ondo badago ere, barrualdean goitik beherako berritzea beharrezkoa izango du. Monumentu kualifikatu izendapena izatean, administrazioaren laguntza jasotzea espero du Udalak.