Iñaki Berasategi, Elisabet Ena eta Xabier Berasategi arkitektoek egindako proiektuari jarraituz egiten dihardute Arostegi jauregian erakusketa aretoa jartzeko lanak. Esan bezala, lanak amaitzear daude. Proiektuaren arduradunen arabera, hamabost egun barru lanak amaituta izango dira.
Erakusketa areto berriak 179 m2ko azalera izango du eta arte areto gisa erabiliko da. Beheko sotoan (50 m2-koa), berriz, biltegia, komunak eta aire egokituaren makinaria kokatuko da.
Atea zaharberritzen
Bestalde, Donostian zaharberritzen diharduten Arostegiko XVI. mendeko atea areto barruan egongo da ikusgai. Jauregiaren sarreran ate berria jarriko dute.
Abdon Juaristiren margoak inauguraziorako
Areto berria Abdon Juaristi zenaren margo erakusketa batekin zabalduko dute, udazkenean. Udaleko arduradunek ez dute oraindik inaugurazio data zehaztu.