Astronomiarendako egun historikoa da biharkoa, ekainak 8; izan ere, Artizarra eguzkiaren aurre aldetik pasatuko da lehenengo aldiz 1882. urtetik; hortaz, bizirik dagoen inork ez du berau ikusi. Fenomeno hori ez da Ipar Hemisferioan berriro gertatuko 120 urtean.
Hori begiratzeko behaketa publikoa antolatu du Ilatargi Astronomia Taldeak. Bergarako Ibargarai kalean Aranzadi Ikastolak duen patioan egongo dira, teleskopioak muntatuta, 09:00etatik eguerdira arte, nahiz eta igarotzea bera 07:30ak inguruan hasiko den. Edozeinek du hurbildu eta Artizarraren igarotzea ikusteko aukera.
Hainbat aholku
Katalejoa erabilita, edozeinek etxetik ikus dezake fenomenoa. Oso garrantzitsua da eguzkiari zuzenean ez begiratzea, are gutxiago teleskopio edo prismatikoekin, behin betiko kalteak jasan ditzakete-eta begiek.
Bide sinpleena da prismatikoak erabilita eguzkiaren irudia pantaila zuri batean (kartoi zuria, folioa ) proiektatzea. Hobe da prismatikoen objektibo bat estaltzen bada. Pantailan ikusiko da orban borobil eta ilun bat, Artizarra pasatzen ari denean.