Gabonetan herriko hainbat dendatan eta tabernatan ikusgai egon ostean, gaur zabaldu dute Arrasateko Kulturaten Udazkena Euskal Herrian argazki lehiaketan parte hartu eta epaimahaiak aukeratutako lanak. 44 argazki dira denera, Euskal Herriko hainbat txokotan ateratakoak: esaterako, Txindokin, Pirinioetan edota Urbasan batzuk; Monterronen, Santa Barbara parkean eta Kurtzetxikin beste batzuk.
Artgazkik, Arrasateko Argazki Elkarteak, lehiaketa antolatzen duen bigarren urtea izan da aurtengoa, eta bertako lehendakariorde Ricardo Santa Cristinaren esanetan oso pozik daude izandako erantzunarekin: “Argazkien kalitatea oso ona izan da, eta aurreko urtean baino lan gehiago jaso ditugu”.
Erakusketa urtarrilaren 28ra bitartean egongo da zabalik, astelehenetik egubakoitzera, 17:30etik 20:30era.
Aspanogirentzako laguntza
Epaimahaiak Amaia Arzamendiren Perretxikoa argazkiari eman zion lehen saria; Andoni Iñarraren Haizea-ri bigarrena eta Iñaki Nuñezen El bosque-ri hirugarrena. Dena den, erakusketako ikusleek ere izango dute beraien argazki gustukoena zein den esateko aukera, eta botoa ematen duten guztien artean argazki kamara bat zozketatuko dute.
Argazkiak ikusi bakarrik ez, erosteko aukera ere egongo da. Joan den urtean bezala, salmenten bidez ateratako diru guztia Aspanogirentzat, Gipuzkoako Haur Minbizidunen Guraso Elkartearentzat izango da.