goiena.eus

Jende asko hurbildu da Amaiara Micah P. Hinson eta Izaro zuzenean ikusteko

  Kultura  Arrasate

Gaztemaniak-en ekimenez, Micah P. Hinson eta Izaro izan ziren zuzenean atzo, hilak 29, Arrasateko Amaia antzokian. Hall-ean izan behar zen kontzertua baina jende asko hurbildu zenez, antzoki barruan egin zen. Bi artistek, nor bere estiloan, emanaldi gogoangarria eskaini zuten.

Jende asko hurbildu da Amaiara Micah P. Hinson eta Izaro zuzenean ikusteko
Izaro zuzenean atzo, Amaia antzokian. | Ikusi handiago | Argazki originala

Izaro izan zen agertokira igotzen lehena. Hirukote formatuan etorri ziren: Izaro Andres Zelaieta, abeslari gisa eta gitarrarekin zein baxuaz; Iker Lauroba, baxuarekin, gitarrarekin eta teklatuekin; eta, hirukotea osatzen, Oriol Flores baterian. Emanaldi ederra izan zen, 40 bat minutukoa, eta Om diskoko abestiak oinarri izan zituena.

Ondoren, Micah P. Hinson Texasko (AEB) musikariaren bakarkako saioaren txanda heldu zen. Ordu eta erdi luzez jo zuen, gitarra eta haren ahots berezia lagun. Itxura xelebreaz igo zen, petoa jantzita eta gitarra ia lepoan zuela. Umore puntuaren ere busti zuen emanaldia, kantu batetik bestera AEBko ingeles itxian egiten zituen komentario xelebreekin. Proposamen interesgarria, ezbairik gabe.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa