Artgazki elkarteak Arrasateko II. Argazki Lehiaketa antolatu du aurtengo San Juan jaietarako. Argazkiak aurkezteko epea ekainaren23tik27raizangoda.
Rallytik lehiaketara
Aurtengo lehiaketa ezberdina izango da; aurreko urtean jende gutxi aurkeztu zela diote antolatzaileek, rallya izan baitzen, eta presioa handiagoa zen lanak entregatzeko orduan. Aurtengo dinamika, beraz, ezberdina izango da, jaiak amaitu arte izango da argazkiak aurkezteko aukera.
Anibal Carmona antolatzailearen hitzetan: ''Edizio ona izan zen, argazki politak jaso genituen, baina, rallyaren kontuagatik, gutxi aurkeztu ziren, eta pena eman zigun.''Antolatzaileen helburua herriko jaiak sustatzea da. Argazki lehiaketaz gain beste ekintza batzuk egiteko konpromisoa hartu du Artgazki taldeak.
Sari potoloak
Sari banaketa uztailaren 8an izango da, Kajoi tabernan, 19:00etan.Bi kategoria badaude ere, zazpi sari lortzeko aukera izango dute debagoiendarrek. Argazki onenaren kategorian, hiru sari banatuko dituzte; hirugarren argazki onenarentzat 100 euro eta garaikurra; bigarren argazki onenari 150 euro eta garaikurra eta lehen argazkionenari 300 eta garaikurra. 16 urtetik beherako gazteek ere izango dute parte hartzeko aukera, eta argazki kamera bana –CanonEos M– jasoko dute bi irabazleek. Horrez gain, aurkeztutako argazki guztietatik originalenak 100euroko saria irabaziko du eta parte-hartzaile guztien artean afari bat zozketatuko dute Arteaga jatetxean bi pertsonarentzat.
Izen ematea
Izenematea dohainik izango da eta, gehienez, parte hartzaile bakoitzak bi argazki bidaltzeko aukera izango du. Argazki guztiak lehiaketak@artgazki.org posta-elektronikora bidali beharko dira, ekainaren 27ko gaueko hamabiak baino lehen. Argazkiekin batera izen-abizenak, posta elektronikoa, telefonoa eta argazkiaren izenburua bidali beharko dira. Antolatzaileek esan dute ez dela argazki edizio edo muntaiarik onartuko.
Argazkigintzan eta artean murgilduta dauden epai-mahaiak aukeratuko ditu argazkirik onenak, San Juan jaiak bukatu eta astebetera. Iazko epai-mahaikideak Antonio Murillo antolatzaile eta argazkilaria eta Iñaki Riviere pintorea izan ziren. Aurten ildo beretik jarraituko dutela dio Carmonak.
Iazko irabazleak
Maila paregabea erakutsi zuten iaz irabazleek. 16 urtetik beherako gaztetxoen mailan, bigarren argazkirik onena Maria da Silvak irabazi zuen; lehena, ordea, Jon Elosegik. 16 urtetik gorako sailean hiru saritu egon ziren: hirugarrena, Leire Murillo; bigarrena, Isabel Muñoz; eta lehena, Aive Trujillo.Azkenik,argazkirik originalenaren saria Kontsuelo Errastik irabazi zuen.
Mugikorretatik harago
Gaur egun mugikorrekin edozein argazki ateratzeko aukera badago ere, Artgazki taldeak argazkilaritza profesionalagoa sustatu nahi izan du lehiaketa honekin. Carmonaren hitzetan: ''Betiko argazkilaritza sustatu gura dugu guk: enkoadraketa, konposaketa eta teknikak hobeto lantzeko.'' Jaietan herritarrek argazkilaritzaz disfrutatu ahal izateko ekintza paregabea dela diote.