EAJren aurkako botoekin eta gainerakoen aldekoekin onartu dira 2015eko ordenantza fiskalak

Jokin Bereziartua Lizarazu 2014ko urr. 22a, 17:00

Uraren Udal zergan %2ko igoera eta Ondasun Higiezinen gainekoan %1ekoa. Bi horiexek izango dira 2015eko ordenantza fiskaletan herritarrek igarriko dituzten aldaketa nagusiak. Gainontzeko Udal zerga guztiak eta tasak aurreko urteko prezio berean mantentzen dira: zabor-tasa, kirol instalazioen zerbitzua, Iturbide egoitza, bide publikoaren erabilera pribatiboaren edo aprobetxamendu bereziaren gaineko tasa eta jardueren baimenen tasa, besteak beste. EAJk kontra bozkatu du (4) eta gainerako alderdiek –Bildu, PSE-EE eta Aralar– alde (16). 

Udal Gobernuaren arabera, Uraren kontsortzioak %4 igo dio uraren zerga Udalari eta Udalak herritarrei %2ko igotzea erabaki du. Bestalde, Ondasun Higiezin gaineko zergan Udalak iazko diru bilketa berbera egiteko %1 igo behar izan du zerga. Udal Gobernuko bozeramaile Maider Morrasen arabera, igoera horrek "azalpen tekniko" bat dauka: "Balio katastralaren jaitsiera dela-eta, %1 igo behar du Udalak iazko diru kopuru berbera lortzeko". Gainerakoan, asmo orokorra zergak izoztea da, Morrasen arabera. Bilduk, PSE-EEk eta Aralarrek alde bozkatu dute eta EAJk kontra. 

EAJ: "Guk igoera zero izatea planteatzen dugu"

EAJko zinegotzi Maria Ubarretxenak GOIENAri esan dio, besteak beste, jeltzaleek "igoera zero" izatea planteatzen dutela: "Ez da berria, aurreko hiru urteetan ere hori planteatu dugu. Iaz igoera orokorra %2koa eta zaborrarena %4koa. Baina gure galdera da: azken hiru urtetan Arrasateko zenbat etxetan igo dira soldatak portzentaje horietan? Deflazio baten aurrean bagaude kontraesana iruditzen zaigu Udalak ordenantza fiskaletan igoera bat aplikatzea". 

 

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak