Duela bi aste ekin zioten aurre-denboraldiari Ointxe taldeko mutilek, eta gogor lan egin ostean, gaur izango dute kantxara salto egin eta taldea nola dagoen ikusteko lehenengo aukera; hori bai ez dute edonor aurrean izango. Zornotza Bizkaitarren aurka jokatuko dute Euskal kopako lehenengo partidua; Zilarrezko LEB mailan lehiatuko den taldea hain zuzen. Hala ere, Larreategi pozik dago bi aste hauetan egindako lanarekin eta lehiaketa hasteko gogotsu daude.
Euskal kopan Zilarrezko LEB mailako taldeek eta EBA mailako taldeek neurtuko dute elkar; arrasatearrak gaur Zornotzaren aurka jokatuko dute lehenengoa, eta domekan etxean bigarrena, Santurtziren aurka. Domekakoa izango da taldea etxean ikusteko lehenengo aukera, arratsaldeko 18:30etan Iturripen eta jokalariak ondo ikusten ditu Larreategik.
Beñat Barberena lesionaturik
Barberenaren baja garrantzitsua da, talderen oinarrietako bat izateko etorri delako; hala ere, Gasteizetik etorritako Iban ere frogan dabil eta datorren asteotan argituko da etorkizuna, Larreategiren arabera fitxaketa garrantzitsua izango zen. Barberena ostera, gogotsu dago taldeari lagundu eta ahalik eta azkarren kantxan aspaldiko lagunekin jokatzen hasteko; taldekideak bezala, ilusioz gainezka.
Beraz, hemendik eta urriaren 19ra arte, denboraldi berria hasten den asteburua, orain arteko gogo eta ilusio berarekin jarraituko dute arrasatearrak, kalitatezko saskibaloia denbora luzez etxean izateko helburuarekin.