UCI World Tourrean jarraitzeko behar diren puntuak tarteko, Euskaltel Euskadiko arduradun Igor Gonzalez de Galdeano batera eta bestera dabil puntuak dituzten ziklistak fitxatu nahian. Kanpoko ziklistak. Ikustekoa da sistema horrek zelako mina egin dakiokeen Euskaltel moduko talde bati, filosofiaz aldatzera behartuta, eta euren buruarendako beharrean taldearendako lanean ibili diren ziklistak zigortuaz. Horietako bi dira, hain zuzen, Iban Velasco eta Amets Txurruka; lorpen propioak alboratu eta Samuel Sanchezendako, Nieverendako, Igor Antonendako... lan egin behar izan duten morroiak. Deia egunkariak gaur bota du albistea. Eta segituan zabaldu da olatua. Hain zuzen, Markel Irizarrek laguna lasaitu nahian zera esaten zion astelehenean: "Azken ordura arte ez dute kontratua berritzeko asmorik erakutsiko, baina taldean jarraituko duzue". Bada ez, antza ez da halakorik gertatuko, eta Oñatikoak ere ez du talde laranjaren erabakia ulertu.
Oraingoz, 12 ziklista
Euskaltel Euskadik une honetan 12 txirrindulari ditu taldean 2013 ikasturterako: Samuel, Antón, Nieve, Izagirre anaiak, Landa, Sicard, Egoi Martínez, Pello Bilbao, Ricardo García, Sáez de Arregi eta Cabedo. Eta egunotan Taldeko zuzendari Igor Gonzalez de Galdeano beste ziklista hauekin berbetan dabil: Verdugo, Urtasun, Astarloza, Rubén Pérez, Alan Pérez, Azanza, Oroz, Mínguez eta Cazaux.