Italiako jatorriaz
Teatrino die Piedi antzerki taldeak Sonata a cuatro pies antzezlana eskainiko du. Egia esateko, Laura Kibel artista italiarrak osatzen du talde hori. Ikuskizun horrek bisualki oso animazio berezia du, Kibelek bere gorputzeko atalak erabiltzen dituelako txotxongiloei bizia emateko: eskuak, hankak, belaunak... Eta dekorazioak ere berak propio sortutakoak dira. Hala, atzerritik badator ere, umeek ez dute antzezlana ulertzeko arazorik izango, ez du-eta berbarik egiten.
Trapu zaharra, Seberren
Kale antzerkiarekin jarraituz, Trapu Zaharra taldekoek emanaldia egingo dute Seber Altuben, 20:00etan. Talde hori duela 30 urte sortu zuten, eurek dioten moduan, "handinahi handirik gabe, eguneroko bizitza aurrera atera ahal izateko eta egindako ekintzekin dibertitzeko asmoz". Asmo berekin jarraituko dute; hau da, kale antzerkiko gertutasunaz ikusleak entretenitzea. Besteak beste, Aberiak, El Pisito eta Camping renove lanak egin izan dituzte urte hauetan guztietan, eta seguru Seberren batzen direnek tarte ederra igaroko dutela.
'Bodologuak' Monterronen
Eta barrezka jarraitzeko Seberretik Monterronera (23:00) Mikel Pagadik, Egoitz Lasak eta Nagore Aranburuk egiten duten Bodologuak lanaz gozatzera: euskalduna izatearen burukominak, Elizaren mundu zoragarria, elkarte gastronomikoak, euskaldunon oporrak, opari eta detaileak, etxeko animalien arropak, euskaldunok eta teknologia... Denetariko gaiak, eta denetan ere, umorea, gurea, euskalduna.