Asia, Afrika eta Hegoamerikako etorkinekin dihardute lanean bi elkarteok urte hasieratik. "Euren azoken gainean galdetu diegu: zelakoak diren, maiztasuna, zeinek egiten dituen erosketak… eta baita hemengoen gainean ere: ze igartzen duten faltan, zelako azokak iruditzen zaizkien…", kontatu du Tamara Perezek, Ekin elkarteko ordezkariak.
Azokak garrantzitsuago behar
Eta dagoeneko eskuratu dituzte erantzun batzuk: "Faltan igartzen dutela, esaterako, hemen azokek pisu handiagoa izatea, sarriago egitea; eta produktuei dagokienez, besteak beste, espezieak. Horrez gainera, produktuak freskoak izateak duen garrantziaz jabetzen diren arren, azpimarratu dute supermerkatuetako prezioak azoketakoak baino merkeagoak direla", dio Ekineko ordezkariak.
Zuzeneko traturik ez
Brigitte Castro kolonbiarrak eta ekimeneko parte hartzaileetako batek, berriz, zera gaineratu du: "Supermerkatuak hotzak dira, ez dago eroslearekiko zuzeneko traturik, eta produktu transgeniko larregi dago. Faltan igartzen dira, adibidez, produktu freskoak".