Heriotzaren gaineko lana da Doke taldeak aurkezten duena eta istorioa beilatoki batean kokatzen da. "Pentsatu genuen gai aproposa zela aurtengo. Izan ere, bazeuden aurten mundua amaituko zela zioten hainbat iragarpen, tartean, maiena eta uste genuen egokia zela" esan digu Itziar Rekalde antzezlaneko zuzendariak.
Heriotzan oinarritutako kontakizuna izan arren, umore puntua duen antzezlana dela zehaztu digu Rekaldek: "Guk gaiak sakonki lantzen ditugu, baina aldi berean gure jarrera arina eta positiboa izaten da. Beraz, esan dezakegu, gure obrak atseginak izaten direla. Nahiz eta, beti gelditzen den barrenean zer pentsatu. Modu arinean, hausnarketarako bidea eskaintzen dugu".
Sarrerak salgai
Ekainaren 1ean eta 2an egingo dute antzezlana Doke taldekoek Amaia Antzokian. Dagoeneko sarrerak salgai daude honako taberna eta saltokietan: Ceciaga, Monte, Jaizale, Txukun, Muruamendiaraz, Zabaleta eta Lore. Sarrera 10 euro da.
Bestalde, bi egunetan, sarrerak leihatilan bertan erosteko aukera ere egongo da ordubete lehenago.
Arrasatetik kanpora
Arrasaten ez ezik, beste zenbait herritan ere izango da Paradisuko atean lana ikusteko aukera, tartean, Aretxabaletan eta Aramaion. "Uda osterako beste zazpi bat emanaldi ditugu lotuta eta gehiago egiteko asmoa dugu" esan digu Rekaldek.
Zaletasuna sortzea
Antzezlaneko zuzendariak adierazi digu Doke Antzerki Taldearen helburua ez dela soilik jendeari euren lanak erakuste: "Antzerkia bera lantzea eta zaletasuna sortzea ere bada guk nahi duguna". Hala, urtero egiten dute jendea euren antzerki taldera erakartzeko deialdia eta gaurko aurkezpena ere aprobetxatu dute horretarako.