Berrikuntzekin etorri da aurten Arrasateko Zuhaitz Eguna, izan ere azken urteetan Garagartza inguruan landatu dituzte zuhaitzak; gaur baina, San Andres auzoan, Mugarrieta inguruan egin dituzte lanok.
Arizmendi Ikastolako eta Arrasateko Herri Eskolako DBH-ko 6. Mailako ikasleak ibili dira lan horretan, eta irakasleek eta udaleko langileek lagunduta ez dute lan makala egin. 110 zuhaitz landatu dituzte denera: 40 haltza, 20 haritz, 20 lizar eta gainerakoak, urkiak, pagoak eta ezkiak.
Eguraldia lagun izan dute, eta egindako lanak izan du bere ordaina. Behin zuhaitz guztiak landatutakoan hamaiketako eman diete, baita opari bat ere: Emausek birziklatutako materialarekin egindako estutxeak, hain zuzen ere.
Datorren urterako aldaketa posibleak
Pello Garai Arrasateko Udaleko Ingurumen Saileko landa guneko teknikariak egunaren balorazio positiboa egin dut. Dena den., esan du datorren urtera begira hainbat aldaketa aztertzen dabiltzala, besteak beste, Zuhaitz Eguna asteburuan egitea, horrela gurasoen partaidetza ere sustatuz. Ikutixon egitea da planteatzen den beste aldaketa bat, zuhaitzak hango bidegorriaren ertzean landatuz.