Aranzaditik talde bakarra joan zen eta Arizmendi Ikastolatik, bi: Gaztelupekoa bat eta Almenekoa bestea. Bada, azken horiek bigarren postuan geratu ziren, eta apirilaren 25ean Sitgesen egingo den Estatu mailako kanporaketan parte hartuko dute.
Udaberri arabiarra berbagai
MUko Eskola Politeknikoa parlamentu bilakatu zen egun batez zapatuan. "Antolakuntza ikusgarria izan zen. Dena oso modu serioan antolatuta zegoen, denborak ondo neurtuta... Benetako parlamentua zirudien", kontatu digu Arizmendiko irakasle Xabier Latorrek. Haren taldeak udaberri arabiarraren gainean hitz egin behar izan zuen. "Gaia aukeratu genuenean nik ez nekien zer zen ere, baina oso interesgarria izan da gaian sakontzea. Oso gertakari garrantzitsua izan da eta asko ikasi dugu", kontatu digu taldeko kide Ainhoa Letek.
Taldean sei kide diren arren, hiru bakarrik joan ahal izango dira Sitgesera: Miren Perez, Ayla Manzanales eta Sinead Nelson. Gainontzeko taldekideek konfiantza guztia dute haiengan. "Uste dut taldeko aproposenak direla, ingeles mailarengatik, eta baita jakituria mailagatik ere. Gauzak ondo prestatuz gero Sitgesen lan ona egin dezaketela uste dut", esan digu Letek. Apirilaren 25ean Arrasaten egon arren, burua Sitgesen izango dutela azaldu digu.
Oraindik edukiak lantzen hasi ez diren arren, baikorrak dira, eta, Sitgesen gauzak ondo eginez gero, Europan izango dute hurrengo hitzordua gure parlamentariek.