Hondakinen kudeaketaren gaia pil-pilean dago. Talde sozialistak bosgarren edukiontziaren aldeko apustua berretsi zuen atzo eta Aritz Arrieta bozeramailearen arabera, atez ateko sistema "osasungarritasunean, erosotasunean eta eraginkortasun ekonomikoan" atzerapausoa da.
Bilduk, berriz, ingurumena eta osasuna gutxien kaltetzen duen sistema dela uste du eta gogoratu dute zaborraren kudeaketa sortzen duenaren ardura dela, hau da, ez dela borondate kontua.
Iraia Sola Bilduko bozeramaileak Debagoienean ditugun bi adibide jarri zituen mahai gainean: Aretxabaletan bosgarren edukiontziaren sistema dago eta, Solaren arabera, Antzuolan, biztanleak hiru aldiz gutxiago izanik, gehiago birziklatzen da: "Hori datu esanguratsua da benetan", adierazi du.
Presoen eskubideen aldeko mozioa
Bestalde, Bilduk presoen eskubideen aldeko mozioa aurkeztu zuen. Orduan ere eztabaida sortu zen talde sozialista eta udal gobernuan daudenen artean. Inazio Azkarragaurizar alkateak amaitu zuen esanez "aro berri" baten gaudela: "Baina badirudi zuek ez zaretela ohartu, oraingoz gatazkarekin konponbidean aurrera egiteko borondaterik ez duzue-eta erakutsi".
Mozioa onartu egin zen Bildu eta Aralarren aldeko botoekin (12), EAJren abstentzioarekin (4) eta PSE-EEren kontrako botoekin (4).
Azkenik, EAJk etxebizitza babestuen salmentaren inguruan beste mozio bat aurkeztu zuen. Onartu egin zen, EAJ eta Aralarren aldeko botoekin (5), Bilduren abstentzioarekin (11) eta PSE-EEren kontrako botoekin (4).
Aurrekontuak hurrengo osokoan, hilaren 26an (18:00)
Egun gutxitan beste ezohiko pleno bat egingo da, 2012rako aurrekontuak onartzeko. Aurrekontuak gaurko plenoan sartzea zen hasierako asmoa, baina azkenean datorren astelehenean egingo da horretarako osoko bilkura; hilaren 26an, 18:00etan. Hori izango da, beraz, urteko azken osoko bilkura.