Eguenak egun bereziak bihurtu dira Arrasaten. Kale giro ederrarekin pintxo-poteoak sustraiak hartu ditu dagoeneko. Bihar Gorripote ekimenarekin ere hasiko dira zenbait taberna eta hori gutxi balitz, twitterreko deialdi batek batuta elkartuko dira biharkoan makina bat lagun: pintxotuit ekimena egingo da.
Eguen buru zuri baterako parrandarako aitzakia hutsa besterik ez da, funtsean. Harreman birtualak, tuit-eztabaidak, pantaila bidezko tira-birak... egunero izaten ditugu euskal tuitlari askok eta gauza bera baina teklatua barik tragua eskuan hartuta egitea da helburua. Hamaika lekutan topo egin eta beti twitterreko gora-beherak aipatzen ibili izan diren zenbait tuitlarik deitu dute eguna eta gonbidapena zabalik, noski, edonorentzat. Baita sare sozialen korapilotan lotu berri direnentzat ere.
Debagoieneko tuitlari eta euskal komunitateko beste hainbat dagoeneko animatu dira #pintxotuit #e16 deialdira! Eta, nola ez, Facebooken ere baduzue deialdia iragarrita: I. Pintxopote twitteroa Arrasaten .