Bihar hasten da izenematea eta martxoaren 10era arte egongo da zabalik: Emakume Txokoan, kiroldegian edo BAZen izenemate orria bete, besterik ez da egin behar. Eta egunean bertan, martxoaren 12an, lasterketa hasi baino ordu erdi lehenago ere eman ahalko da izena. Gainera, aurten parte hartzeko adina 14 urtetik 12 urtera arte jaitsi dute, eta beraz, neraberazoan sartzen hasi diren neskek ere lasterketa egin ahalko dute. Maila bakarra egongo da eta ez da kronometraje ofizialik egongo eta helmuga azken partaidea iritsitakoan itxiko da. Yolanda Perez de Arenaz Aukeako lehendakariak adierazi du parte hartzaile bakoitzak "bere erara" har dezala Takarraran lasterketa: "Ez dugu lehiaketa bat moduan planteatzen baina gura duenak lehiaketa moduan har dezake. Hau da, norbaitek iazko marka hobetu nahi badu, aurrera. Helburua, baina, parte hartzea eta bukatzen saiatzea da".
Bi asteko entrenamendu proposamena
Sasoiko ez dagoena uste duenarendako bi asteko entrenamendua prestatu dute antolatzaileek, iaz moduan. Iratxe Aranburu Arrasateko kirol teknikariak honela azaldu du: "Bi astetan egunez egun jarraitzeko planning-a da, edozeinek egin dezakeena eta lasterketa amaitzen lagunduko duena". Gonbita egina dago: helburua, emakumeek espazio publikoa hartzea –Kalea gurea da! ozen aldarrikatzea– eta kirola emakumeendako ere badela lau haizetara zabaltzea. Izan ere, emakumeendako ekimen herrikoia, errebindikatiboa eta jai giroan ospatzekoa da Takarraran lasterketa.