"Escalofríos" ikuskizuna hiru istoriok osatzen dute. Hiru istorio horiek ez dute inolako zerikusirik elkarren artean, baina kontatzaile sabel-hiztun batek lotu egingo ditu hirurak. Istorio bakoitzean bi aktorek esku hartuko dute, eta efektu bereziak erabiliko dituzte.
"Ohiko beldurrezko istorioak dira, eta ikusleei gertukoak egingo zaizkie", azaldu zigun Itsaso Elias aktoreak. Istorio bakoitzak ordu erdi inguru iraungo du. "Ikuskizunak estetika gotikoa eta beltza dauka, 50eko hamarkadako beldurrezko filmeena-edo", azpimarratu zuten.
Ikuskizun horren lehen estreinaldia Arrasaten egingo dute. Horren ostean, Euskal Herriko eta Espainiako hainbat hiritan antzeztu gura dute.