Arrasateko teknologia zentroaren egiteko garrantzitsu bat enpresen garapen teknologikoa bultzatzeko hartutako konpromisoa da. Eremu horretan 109 proiektutan parte hartu du Ikerlanek. Lan horri esker, bederatzi patente eskari egin dizkiote etxetresna elektriko, garraio bertikal, energia eta telekomunikazioetako bezero enpresek.
Spin off-ak ere bultzatzen ditu Ikerlanek teknologia transferitu eta aberastasuna sortzeko. Enpresa jarduera berriak bultzatzeko bide egokia dira spin off-ak. Bide horretatik sortu da Abantail enpresa ere, diseinu moldagarriaren alorrean zerbitzuak eskaintzen dituena. Bestalde, ingurune adimenak ere bultzada garrantzitsua izan du, Europako AMIGO programaren bitartez. Proiektu horretan, gainera, Fagor Etxetresna Elektrikoak dago sartuta, Europako enpresa garrantzitsuekin batera. Eta Amigo programaren barruan, Ikerlanek Domolab edo etxeko teknologien laborategiaren inguruan, erakusketak egiteko zentro bat du.
2005-2008 urteetarako plan estrategikoaren barruan erreferentziako zentro teknologikoa izan nahi du Ikerlanek Europan. Horretaz gainera, enpresen berrikuntzari laguntza ematen jarraituko du eta baita ikertzaileei ere, ikerkuntza zientifiko teknologikoan, mugikortasuna jakintza eremuetan eta profesionaltasuna behar bezala garatzeko.