Legarzia Promociones taldea azkena da sailkapenean, baina Mugarri Alkesak baino norgehiagoka bat gutxiago jokatu du. Nafarrek norgehiagoka bakarra irabazi dute, eta gainontzeko hirurak galdu. Mugarri Alkesari dagokionez, Gorka Zurutuzaren mutilek orain dela bi aste lortu zuten denboraldiko lehen garaipena, eta joan den astean Getxo baino gutxiago izan ez baziren ere, arrasatearrak esku hutsik itzuli ziren Faduratik.
Alde horretatik, biharko kontrarioa Mugarri Alkesa baino indartsuago ez bada ere, arrasatearrek tentsioarekin hasi beharko dute norgehiagoka, eta baita laurden bakoitzeko hasierako minutuak ere. Joan den astean loak hartuta kantxaratu ziren Getxon, eta horretaz baliatuta, bizkaitarrak 0-15 aurreratu ziren markagailuan. Esan gabe doa, norgehiagoka horrela hasita gaitza dela markagailuari buelta ematea.