Goizeko 8:30ean jo dute Arrasateko gaitariek diana, baina ordurako jende asko zebilen kalean. Horietako asko ohera joateko presa barik. Goizeko lehenengo orduan zezenek eman dute ikuskizuna. Entzierroa oso azkarra izan da; Mondragoeko gazteak zezenak etorri baino askoz ere lehenago hasi dira korrika, eta gutxi izan dira zezenen parean korrika egin dutenak.
Gero, zezen plazan izan diren herritarrek gura beste barre egin ahal izan dute. Batek baino gehiagok abilezia handia erakutsi badu ere, momentuz, herrian ez dugu torero ezagunik izango. Eguerdian, Udaleko ordezkariek San Juanen irudia parrokiatik atera eta Herriko Plazara eraman dute. Han, dantzariek ohorezko aurreskua eta San Juan zortzikoa dantzatu dute.
Omenaldia 80 urtetik gorakoei
12:30ean, Abaroa elkartean omenaldia egin diete 80 urtetik gorakoei, eta Arrasateko alkateak saria eman die 94 urteko Alejandro Martin Lazarori, eta 96 urteko Brigida Monjeri.
Eta, eguneko ikuskizun politena 13:00etan izan da. Monterron parkea goraino bete da Arrasateko Musika Bandaren kontzertuaz gozatzeko. Aurten, gainera, kilikien eta erraldoien laguntza izan dute, eta guztien artean emanaldi ederra egin dute.