Preferenteko Txapelketa amaitzeko sei aste geratzen dira. Batzuendako hil ala biziko sei aste; beste batzuendako lasai jokatu ahal izateko eta datorren denboraldia prestatzen hasteko sei aste. Ez da hori Berioren kasua. Sailkapenaren bigarren postuan dago oraingo asteburuko Mondraren kontrarioa, eta Arrasateko jokalariek ezin motibatuago dagoen talde baten kontra jokatuko dute. Joan den asteko eta oraingo asteburuko kontrarioen artean ezin da alde handiagoa egon. Dagoeneko erregional mailan dagoen Amaikak Bat taldearen kontra jokatu zuen Mondrak joan den astean (2-1), eta hirugarren mailan egoteko apustu sendoa egin duen taldearen kontra jokatuko dute asteburuan. Bata, dena galdutzat eman duen taldea; eta bestea, buruan irabaztea baino ez duen taldea.
Partidu erabat ezberdina
Joan den astean Arrasatekoek izan zuten baloiaren jabetza; oraingo asteburuan, berriz, Beriok baloia gurako du, estutu egingo dute, eta defendatzeaz gain, amorratzen egongo dira gola egiteko; berdinketak ez du-eta ezertarako balio. Berioren zelaian Mondrak ez ditu izango joan den asteko gol aukerak. Horrek esan gura du, jokaldi bakoitzari errentagarritasun handiena atera behar diotela. Eta, kontutan izan Beriok ez duela bat bera ere barkatuko. Norgehiagoka 15:30ean izango da, Berion.