Iaz atxiki zen Arrasateko Udala Oporrak Bakean programara eta aurten ere hala egin du. Horrela, Saharako errefuxiatuen kanpalekuetatik haurrak ekartzeko bidaia Arrasateko udalak ordaintzen du. Bestalde, Jaurlaritzak ere parte hartzen du Osakidetzaren bitartez, hau da, gurera datozen haurrek osasun zerbitzuak izateko eskubidea dute.
Izenemateak udaletxean
Uztailaren hasieran etorriko dira haurrak Arrasatera eta irailaren hasieran itzuliko dira errefuxiatuen kanpalekuetara. Nubi elkarteak dituen datuen arabera, gainera, iaz etorri ziren 4 haur etortzeko prest daude berriro ere. Baina aurten 12 haur ekarri nahi dituzte Arrasatera eta orain arte 7 familia animatu dira. 6 Nubi Elkartekoak dira eta iaz ere izan zuten haurren bat etxean udako oporretan. Udan, beraz, Saharako haurren bat etxean izan nahi izanez gero, Udaletxera jo argibide gehiago jasotzera eta izena ematera.
Bestalde, Arrasateko Sahararen Aldeko Elkarteko hainbat kide hango lurretara abiatuko dira Aste Santuan, hango bizitza gertutik ezagutzeko.