Ehun eta laurogei minutu jokatzeko eta sei puntu eskuratzeko. Gauzak ondo eginez gero, ez da asteburu makala. Mondrak Trintxerperen kontra jokatuko du bihar, eta bolada txarrarekin amaitzeko lehen aukera izango da hori. Domekan, berriz, derbi garrantzitsua jokatuko dute Aretxabaletan.
Bi taldeek errekuperatzeko denbora asko izango ez badute ere, domekako derbira gogo betez joango dira bai Aretxabaletako eta baita Arrasateko jokalariak ere. Aloña Mendiren eta Bergararen kontrako derbiak politak dira, baina ez dago UDA eta Mondraren arteko lehia modukorik. Lehenengo itzulian UDAk balio handiko puntua eskuratu zuen Atxabalpen. Orain, Mondrari tokatzen zaio ondoko herriko futbol zelaian urrea eskuratzea.
Kontutan hartu behar da, gainera, UDAren eta Mondraren arteko partidua ez dela asteburuan izango den derbi bakarra, bihar arratsaldean Aloña Mendi eta UDA izango dira-eta nor baino nor. Ez da asteburu makala izango aretxabaletarrendako.